ភ្នំពេញ៖ គ្រឿងឥស្សរិយយស ថ្នាក់មិត្តភាព និងលិខិតសរសើរដែលចុះហត្ថលេខាដោយប្រធានាធិបតីរុស្ស៊ី លោក វ្លាឌីមៀរពូទីន ត្រូវបានលេខាធិការក្រុមប្រឹក្សាសន្តិសុខនៃសហព័ន្ធរុស្ស៊ីលោក Nikolai Patrushev នាំយកប្រគល់ជូននាយករដ្ឋមន្ត្រីកម្ពុជាដោយផ្ទាល់នៅ វិមានសន្ដិភាពនាព្រឹកថ្ងៃទី១៥ ខែធ្នូ ឆ្នាំ២០២១នេះ។
គ្រឿងឥស្សរិយយស ថ្នាក់មិត្តភាព នេះត្រូវបានប្រធានាធិបតីរុស្ស៊ីចុះហត្ថលេខាផ្ដល់ជូនសម្ដេចតេជោ ហ៊ុន សែន កាលពីថ្ងៃទី២៥ ខែកក្កដា ឆ្នាំ២០២១កន្លងទៅ សម្រាប់ការចូលរួម ចំណែកដ៏សំខាន់ ក្នុងការពង្រឹង មិត្តភាពរវាងប្រជាជន រុស្ស៊ីនិងកម្ពុជា។
ក្នុងឱកាសប្រគល់និងទទួលគ្រឿងឥស្សរិយយសនេះលោក Nikolai Patrushev បានរៀបរាប់ពីចំណងទំនាក់ទំនងរវាងកម្ពុជា និងរុស្ស៊ីដែលមានកន្លងមក និងថាប្រទេសរុស្ស៊ីនឹងពង្រឹងការទំនាក់ទំនងរវាងប្រទេសទាំងពីរឱ្យកាន់តែខ្លាំងក្លាថែមទៀតផងដែរ។
សម្ដេចតេជោ ហ៊ុន សែន បានរំលឹកពីអតីតកាលរបស់កម្ពុជា និងរុស្ស៊ី តាំងពីពេលដែលរុស្ស៊ីនៅជាសហភាពសូវៀត ថាប្រទេសនេះនៅតែបន្តគាំទ្រដល់កម្ពុជាជានិច្ច។ សម្ដេចបានជំរុញដល់ប្រទេសរុស្ស៊ីក្នុងការពង្រីកកិច្ចសហប្រតិបត្តិការជាមួយកម្ពុជាបន្ថែមទៀតរួមមានការបង្កើតពាណិជ្ជកម្មសេរីរវាងកម្ពុជា-រុស្ស៊ី និងការបង្កើតក្រុមហ៊ុនជួសជុលគ្រឿងចក្រនៅកម្ពុជាផងដែរ។
គ្រឿងឥស្សរិយយស ថ្នាក់មិត្តភាព គឺជាគ្រឿងឥស្សរិយស របស់ រដ្ឋ នៃសហព័ន្ធរុស្ស៊ី ដែលត្រូវបានបង្កើតឡើង ដោយលោក Boris yeltsin អតីតប្រធានាធិបតីរុស្ស៊ី តាមរយៈ ក្រឹត្យលេខ៤៤២ កាលពីថ្ងៃទី២ ខែមិថុនា ឆ្នាំ១៩៩៤ ដើម្បីផ្ដល់ឱ្យ ជនជាតិរុស្សី ឬជនជាតិដទៃ ដែលខិតខំលើកស្ទួយ ចំណងមិត្តភាព ជាមួយប្រជាជនរបស់ប្រទេសរុស្ស៊ី។
ព្រះរាជាណាចក្រកម្ពុជា និងសាធារណរដ្ឋសហព័ន្ធរុស្ស៊ី បានភ្ជាប់ទំនាក់ទំនងការទូតជាមួយគ្នាតាំងពីថ្ងៃទី១៣ ខែឧសភា ឆ្នាំ១៩៥៦ រហូតមកដល់ឆ្នាំ២០២១នេះមានរយៈពេល៦៥ឆ្នាំហើយ៕